Праблема пустуючых і старых дамоў не раз падымалася на старонках нашай газеты. Чарговай падставай зноў звярнуцца да гэтага пытання стаў зварот у рэдакцыю жыхаркі г.п. Любча В.Я. Хартановіч.
Валянціна Яўгеньеўна на працягу дзесяці гадоў жыве ў Любчы. Побач па вул. Чайкоўскага, 20 пустуючы дом. Ён адкрыты для доступу, а ўнутры сапраўдная звалка. Найбольшую нязручнасць для Валянціны Яўгеньеўны вызываюць адуванчыкі, якія растуць па ўсёй тэрыторыі закінутага ўчастка і насенне якіх пастаянна прылятае на яе агарод.
– Гэта толькі на першы погляд адуванчыкі – прыгожыя кветкі, а для агароднікаў – пустазелле, якое не так проста звесці, – скардзіцца В.Я. Хартановіч. – Я штогод звяртаюся ў сельвыканкам, каб гэту тэрыторыю прывялі ў парадак своечасова, пакуль насенне адуванчыкаў не пачынае рассейвацца. Няўжо за столькі гадоў нельга было вырашыць праблему з гэтым домам і ўчасткам?
Сітуацыю пракаменціраваў старшыня Любчанскага сельвыканкама І.М. ЯРМАЦ.
– Пустуючыя і старыя дамы – вялікая праблема, якая існуе не толькі на тэрыторыі нашага сельсавета і раёна, але і па ўсёй краіне, – гаворыць І.М. Ярмац. – На тэрыторыі нашага сельсавета каля 1000 пустуючых дамоў, у тым ліку больш за 400, дзе няма ўладальнікаў. Незаселенныя дамы – гэта яшчэ і закінутыя зямельныя ўчасткі, догляд за якімі ў сельскай мясцовасці ажыццяўляюць сельвыканкамы. Усе работы выконваюць сезонныя рабочыя, якія пачынаюць працаваць у пачатку красавіка. У першую чаргу парадак наводзіцца на могілках (іх на тэрыторыі сельсавета 13), воінскіх пахаваннях і манументах (24) і цэнтральных вуліцах населеных пунктаў, якіх у складзе сельсавета 24. Мы проста не маем рэсурсаў, каб усе тэрыторыі былі абкошаны адразу, на гэта патрэбен час. Тым не менш сітуацыя з пустуючымі дамамі і адпаведна прылеглымі тэрыторыямі знаходзіцца пад пастаянным кантролем. На ўчастку па вул. Чайкоўскага, 20 у г.п. Любча вышыня травы і пустазелля на сённяшні дзень не перавышае 15-20 см. Каб вырашыць лёс гэтага дома і адпаведна ўчастка, мы не раз спрабавалі ўстанавіць месцазнаходжанне ўласніка. Ёсць інфармацыя, што гаспадыня памерла, але для таго, каб сельвыканкам мог прыняць пэўныя меры (на пачатку прызнаць дом вымарачным), неабходна атрымаць пасведчанне аб смерці гаспадыні. Далей – упэўніцца, што няма нашчадкаў ці атрымаць іх згоду на тое, каб дом перайшоў ва ўласнасць сельвыканкама. У любым выпадку такая працэдура доўгатэрміновая і праводзіцца праз суд.
Напрыканцы Іван Мікалаевіч запэўніў, што ў бліжэйшы час тэрыторыя на ўчастку каля дома па вул. Чайкоўскага, 20 будзе абкошана, і стрымаў сваё слова. Праз некалькі дзён Валянціна Яўгеньеўна патэлефанавала ў рэдакцыю і паведаміла, што ўсё зроблена. Аднак нам бы хацелася звярнуць увагу на яшчэ адну праблему, якая звязана з пустуючымі дамамі. Гэта рэальная небяспека, якую яны нясуць для людзей.
– Закінутыя дамы часта становяцца месцам збору грамадзян, якія злоўжываюць спіртнымі напіткамі, – гаворыць намеснік начальніка Навагрудскага РАУС, начальнік міліцыі грамадскай бяспекі А.П. КРАЎЧУК. – Супрацоўнікі міліцыі, якія ажыццяўляюць ахову грамадскага парадку, пастаянна правяраюць такія будынкі і ў выпадку выяўлення фактаў адміністрацыйнага правапарушэння прыцягваюць адпаведных грамадзян да адказнасці. На жаль, часта ў пустуючых дамах і ў горадзе, і ў раёне можна ўбачыць і падлеткаў. Напярэдадні летніх канікул хочацца звярнуцца да бацькоў, каб растлумачылі сваім дзецям аб небяспецы, якую нясе знаходжанне ў такіх дамах, а таксама кантралявалі іх вольны час. У рэспубліцы вядомы выпадкі абрушэння пустуючых і старых дамоў, распаўсюджаны і пажары ў іх. Незразумела толькі, чаму людзі гэта ігнаруюць і безадказна ставяцца да сябе, свайго здароўя і жыцця. Падобныя збудаванні негатыўна ўплываюць на стан грамадскай бяспекі, таму пастаянна знаходзяцца пад пільнай увагай супрацоўнікаў міліцыі.
У раёне пастаянна праводзіцца работа па скарачэнні пустуючага жылля і закінутых будынкаў, аднак канчаткова вырашыць гэту праблему проста немагчыма. Лёс адных дамоў вырашаецца, але з’яўляюцца другія. Таму мясцовыя ўлады і адпаведныя службы вымушаны пастаянна трымаць руку на пульсе. А людзям варта больш адказна ставіцца да ўласнай бяспекі і такія будынкі абмінаць. Калі пустазелле можна звесці, то наступствы ў выпадку абрушэння ці пажару ў старым доме могуць быць неабарачальнымі.
Настасья Леанідава, "НЖ"
Фота аўтара
Стоит почитать:
Объявления на столбах: как сохранить порядок?
