Большасць навагрудчан і гасцей нашага горада і раёна адзначаюць, што ў апошнія гады Навагрудчына абнавілася і папрыгажэла. Змяніліся вуліцы, дамы і будынкі дагледжаны, з ранняй вясны да позняй восені квітнеюць клумбы. І вось такую чысціню і парадак хочацца бачыць усюды. У тым ліку ў такім важным месцы, як аўтобусны прыпынак. Аднак тут не ўсё так добра, асабліва на прыпынках у сельскай мясцовасці.
Не хочацца рабіць высновы па адным толькі аўтобусным прыпынку ў аграгарадку Нягневічы, які выглядае не зусім прывабна. А пра тое, што гэты прыпынак наогул знаходзіцца ў аграгарадку, напэўна, ведаюць толькі мясцовыя жыхары. Тут няма нават указальніка з назвай населенага пункта. Мы праехалі і па іншых аграгарадках, вёсках, а таксама сярэдне- і маланаселеных пунктах. І тут сітуацыя мала чым адрозніваецца: аблупленыя сцены, непрыбранае смецце, бутэлькі з-пад напіткаў, на многіх знайшлі прытулак поўныя мяшкі са смеццем. І гэта месца, дзе дарослыя з дзецьмі чакаюць грамадскі транспарт.
Адразу ўзгадваецца мудрае выказванне пра тое, што чыста не там, дзе прыбіраюць, а там, дзе не смецяць. Магчыма, і так. Аднак цікава: хто ж адказны за парадак на аўтобусных прыпынках у нашым раёне?
За тлумачэннямі мы звярнуліся да галоўнага ўрача Навагрудскага занальнага цэнтра гігіены і эпідэміялогіі Пятра ГРАМЫКІ.
– Тэатр пачынаецца з вешалкі, а дарога – з аўтобуснага прыпынку, – і гэта сапраўды так. Аўтобусны прыпынак з’яўляецца месцам пасадкі і высадкі пасажыраў. Тут павінна быць утульна і чыста. Аднак такая сітуацыя назіраецца не на ўсіх прыпынках раёна, на большасці патрэбна навесці парадак, – гаворыць галоўны ўрач. – У нас ёсць прыпынкі, якія знаходзяцца на абслугоўванні ДРБУ-189 (дарогі мясцовага значэння) і ДЭУ-56 (дарогі рэспубліканскага значэння). Падчас работы камісіі былі правераны прыпынкі, асаблівая ўвага была звернута на стан прыпынкаў у аграгарадках, аб’ектаў дарожнага сэрвісу. Трэба сказаць, што калі па прыпынках, якія абслугоўвае ДЭУ-56, пытанняў у нас амаль не ўзнікла, то па прыпынках, якія знаходзяцца на абслугоўванні ДРБУ-189, заўваг вельмі шмат. У арганізацыі на абслугоўванні знаходзіцца больш за 130 дарог. На дарогах мясцовага значэння маюцца аўтобусныя павільёны (39) і пляцоўкі (130). На гэтых аб’ектах правяраецца іх добраўпарадкаванне: лаўкі, сметніцы, стан павільёна, чыстата і парадак. Летам у нас вельмі шмат было пытанняў па ўборцы смецця і абкошванні. У верасні на першым месцы – афарбоўка аблупленых сцен, надпісаў. Такіх у нас 21 населены пункт, а рамонт і афарбоўка лавак патрабуецца ў 15 населеных пунктах. Аднак трэба сказаць, што непрывабны выгляд прыпынкаў – гэта бяда не толькі дарожнай службы. Сметніцы, якія ўстаноўлены на прыпынках, прызначаны для збору дробнага смецця: акуркаў, білетаў, абгортак ад цукерак ці марожанага. Але несумленныя грамадзяне ператварылі аўтобусныя прыпынкі у звалкі, куды выкідваюць пакеты і мяшкі са смеццем.
– На абслугоўванні нашага прадпрыемства знаходзіцца 664 км дарог мясцовага значэння ў раёне. Асобных грошай на ўтрыманне аўтобусных прыпынкаў не выдзяляецца. У першую чаргу сродкі выдзяляюцца на бяспеку дарожнага руху, – расказаў начальнік Навагрудскага ДРБУ-189 Яўгеній ВІНЧА. – Нашы супрацоўнікі праводзяць ямачны рамонт, грэйдзіраванне, падсыпку размытых дарог. Разам з тым паступова праводзім і рамонт аўтобусных прыпынкаў. Ужо адрамантаваны прыпынкі ў в. Рутка, Чамяроўка, дэманціраваны прыпынак паблізу в. Будныя, хутка будуць устаноўлены новыя павільёны ў в. Вераскава і Заполле. У бліжэйшыя два месяцы ва ўсіх 15 населеных пунках будзе зроблены рамонт прыпынкаў. Ачыстка ад смецця паласы адводу таксама ў абавязках дарожнікаў. Аднак хочацца звярнуць увагу на тое, што некаторыя людзі ператвараюць яе ў сапраўдную звалку. Яны пакідаюць каля дарогі ці на прыпынках пакеты, іншыя непатрэбныя рэчы. Замест выканання сваіх асноўных абавязкаў (забеспячэння камфортнага, бесперашкоднага і бяспечнага карыстання аўтамабільнымі дарогамі) дарожныя работнікі вымушаны прыбіраць за грамадзянамі смецце ўздоўж трас і на аўтобусных прыпынках. Урны на аўтобусных прыпынках прызначаны для невялікай колькасці дробнага смецця пасажыраў, якія чакаюць маршрутныя транспартныя сродкі. Аднак у некаторых населеных пунктах мясцовыя жыхары прыносяць пакеты на прыпынак, пакідаюць смецце на ўскрайках дарог. Праблема забруджвання аўтобусных прыпынкаў найбольш актуальная для аг. Шчорсы, Нягневічы, Пятрэвічы, Уселюб, в. Налібакі, Гнесічы, Старыя Нягневічы. У летні перыяд непрыгожа выглядаюць прыпынкі вёсак Слабада, Купіск. Дарожнікам даводзіцца затрачваць значныя сродкі, задзейнічаць людзей для навядзення парадку. У выніку траціцца час, сродкі, нерацыянальна выкарыстоўваецца тэхніка. Для таго, каб прыцягваць да адказнасці парушальнікаў, у многіх раёнах пачалі выкарыстоўваць мабільныя камеры фотафіксацыі («фотапасткі»).
Як паабяцаў начальнік Навагрудскага ДРБУ, у бліжэйшыя два месяцы парадак на аўтобусных прыпынках будзе наведзены, аднак многае, пагадзіцеся, залежыць ад нас саміх. Калі хочаш, каб навокал было чыста, прыгожа і ўтульна, пачні з сябе, з культуры паводзін, а таксама паважай чужую працу.
В. ЗАЧОСАВА, «НЖ».
Стоит почитать:
Забытыя, закінутыя, небяспечныя
