Шаноўныя браты і сёстры ў Хрысце!
У гэты час аблічча супольнасці веруючых у Хрыста яснее бляскам Уцелаўлёнага Слова, сапраўднага святла для ўсіх народаў – Хрыста. Гэты бляск нашага Збаўцы свеціць у цемры і Ён з’яўляецца непераможным святлом, бо рассвятляе змрок душы чалавека, прыслухоўваецца да жаданняў яго сэрца, дапамагае яму знайсці адказы на найважнейшыя пытанні і можа задаволіць імкненні сэрца чалавека – ажыццяўленне шчасця і яго паўнаты. Кожны раз у гэты прыгожы зімовы час узгадваем тое, што Езус нарадзіўся ў звычайным месцы з цікавай назвай Бэт-Лехэм – дом хлеба. Дом і хлеб – два словы, якія найлепш акрэсліваюць тое, у чым маем патрэбу ў двайным сэнсе: духоўным і фізічным. З нараджэння Езуса ў Бэтлеем ме мы чэрпаем непагасную надзею на лепшае заўтра, супакой, які паходзіць ад Бога, і на сустрэчу з людзьмі добрай волі, пра якіх спяваюць анёлы.
Шматлікія знешнія цяжкасці і праблемы сучаснасці, на шчасце, не здольныя закрыць найважнейшага зместу святкавання Божага Нараджэння. Святы нагадваюць нам ісціну аб прысутнасці Бога паміж намі. Ён заўсёды там, дзе любоў і дабрыня. Божую любоў мы асабліва адчуваем падчас удзелу ў Эўхарыстыі. Святая Імша – гэта не толькі сустрэча з Богам, але таксама з іншымі людзьмі, якіх у духу веры называем братамі і сёстрамі.
Гэта вялікая ўрачыстасць і адначасова падсумаванне таго, як мы перажылі гэты год. Галоўнае, каб пасярод цяжкасцей, клопатаў, гора і праблем нашы сэрцы не скамянелі, каб мы былі здольныя ўбачыць Божыя дары, Яго дабрыню і клопат пра сваіх дзяцей.
За амаль ужо мінулы 2021 год вернікам з Навагрудка ёсць за што падзякаваць Богу. Перш за ўсё за дар жыцця, веру і магчымасць удзелу у Святой Імшы, за здароўе, за многія праведзеныя духоўныя і культурныя мерапрыемствы, якія былі ў нашай парафіі ў гэтым годзе, за тое, што мы сталі больш сталыя ў веры і, можа, хоць крыху наблізіліся да Хрыста.
Варта ўзгадаць, што ўвесь мінулы 2021 год мы кожны дзень перад Найсвяцейшым Сакрамантам узносілі малітвы за нашу Радзіму, працягвалі пазнаванне Божага Слова ў біблійнай школе «Прафэтас», пры парафіяльным доме правялі рэкалекцыі «Духоўнага распазнавання», «Аздараўленчая сіла прабачэння» – правёў гэтыя рэкалекцыі ксёндз Віктар Ханько з Мастоў. Нашы дзеці разам з сястрой Назарыяй паставілі прыгожую Пасхальную пастаноўку. Першы раз ладзіліся рэкалекцыі для працаўнікоў сферы ІТ, рэкалекцыі «Богашукання» з ксяндзом Аляксандрам Жарнасекам, была ўрачыста адкрыта выстаўка «Храмы Радзімы» мастака Анатоля Наліваева, ксяндзом-арцыбіску-пам Тадэвушам Кандрусевічам урачыста асвечаны алтар Святога Крыжа. Былі праведзены майстар-класы па маляванні для дзяцей і мастацкі пленар для дарослых мастаком Надзеяй Бука. Для моладзі з усёй Беларусі былі праведзены рэкалекцыі «Thalita Kum», быў распачаты пазнавальны курс «Абаронца веры» і евангелізацыйны цыкл керыгматычных катэхезаў Альфа-курса, прайшлі рэкалекцыі для сем’яў прайшлі рэкалекцыі для сем’яў руху «Сужанскія сустрэчы». Святаром Віктарам Ханько былі праведзены рэкалекцыі для дарослых «Effatha» і адна з галоўных духоўных падзей 2021 года – міжнародны малітоўны кангрэс у абарону жыцця. Айцец Аляксандр Жарнасек правеў вельмі актуальныя рэкалекцыі на тэму «Палюбіць і прыняць самога сябе». Не менш важнай падзеяй стала перэгрынацыя (наведванне) копій цудадзейных ікон Маці Божай са святых месцаў Беларусі, якая адбывалася на працягу 9-ці дзён.
Усе гэтыя падзеі змаглі адбыцца дзякуючы малітвам і салідарнай дапамозе мясцовых вернікаў, духоўна актыўных навагрудчан, якія ствараюць парафіяльную супольнасць – сям’ю дзяцей Божых, за што я, як душпастыр, асабіста дзякую Богу.
Няхай гэтае вялікае свята, якое мае свой пачатак у Бэтлееме, прычыняецца да таго, каб нашы дамы ўсё больш станавіліся месцамі цёплых сустрэч са сваімі роднымі, блізкімі, сябрамі, з якімі адчуваем сябе добра і бяспечна. Няхай гэты найбольш просты прэсны хлеб – аплатка, якая складаецца з мукі і вады і якой мы дзелімся падчас вігілійнай вячэры з найбольш дарагімі нашаму сэрцу людзьмі, будзе знакам усяго таго, што нам неабходна, каб жыць годна і з верай.
Сардэчна жадаю ўсім вернікам Каталіцкай Царквы шчырай тугі па Эўхарыстычнай супольнасці ў парафіяльным касцёле, а таксама большага даверу Богу, які літуецца над сваімі дзецьмі і нікога не адсылае з пустымі рукамі. Няхай Божая любоў пастаянна прысутнічае ў Вашых сем’ях. Жадаю ў надыходзячым Новым 2022 годзе заставацца вернымі Богу. Няхай не згасае Ваша надзея! Божага благаславення Вам у Новым годзе!
Са святам Вас Божага Нараджэння!
Пробашч парафіі Святога Міхала Арханёла, ксёндз, доктар багаслоўя Юрый Жэгарын.