Жыццё каталіцкіх вернікаў немагчыма ўявіць без духоўна-асветніцкіх сустрэч, фестываляў і іншых мерапрыемстваў. Ладзяцца яны і ў парафіі Святога Казіміра ва Уселюбе, храм якой прысвечаны Маці Божай Новага Жыцця. Так, з 25 па 27 снежня ў адным з самых старажытных касцёлаў Беларусі адбудуцца калядныя рэкалекцыі «Адрадзіся да Новага Жыцця!».

Рэкалекцыі – гэта духоўныя практыкаванні на працягу некалькіх дзён, асабліва прысвечаных Богу, падчас якіх удзельнікі разважаюць над сваёю вераю, адносінамі з Богам і блізкімі, іншымі аспектамі рэлігійнага жыцця.

– Тэматыка чарговых рэкалекцый выбрана невыпадкова, – адзначае адна з памочнікаў настаяцеля парафіі, жыхарка Мінска Святлана Герасімовіч. – Кожны раз, калі мы адчуваем, што нашае жыццё зайшло ў нейкі тупік, мы пачынаем шукаць выйсце. Бо надзея – гэта апошняе, што застаецца ў нас у такіх выпадках… І напэўна, калі скарыстацца розумам, то можна сказаць сабе: калі я рабіў нешта ўсё маё жыццё і гэта ў выніку прывяло мяне ў тупік, то патрэбна, па-першае, перастаць рабіць гэта, бо яно не вядзе мяне да паўнавартаснага жыцця, супакою і шчасця, а, па-другое, вярнуцца ў тую кропку майго жыцця, з чаго пачаўся мой шлях у накірунку да гэтага тупіка… Бо, калі мы будзем рабіць усё як заўжды, у нас усё будзе як заўжды… А калі мы хочам нейкіх перамен, то патрэбна знайсці ў сабе сілы, жаданне і матывацыю для змянення сябе.

– Кожны чалавек створаны для шчасця. Кожны! Бо шчасце, радасць – гэта стан любові. А Бог ёсць Любоў. І калі мы гэта разумеем, то ўсведамляем і тое, што стан знаходжання разам з Богам – гэта стан любові і радасці, стан шчасця, супакою, невычэрпнай падзякі і натхнення. Калі мы толькі зразумеем, што мы – стварэнні Божыя і што мы любімыя Самім Стваральнікам, мы адкажам сабе на пытанне, хто мы ёсць, – разважае Святлана. – Каб дапамагчы чалавеку, Бог, які вельмі любіць чалавека, пасылае на зямлю свайго адзінароднага сына Езуса Хрыста – цалкам Бога і цалкам чалавека, – каб выратаваць чалавецтва з ціскоў граху. Езус прыходзіць у наш свет праз нявінную Дзеву. Праз Езуса і Марыю прыйшла да нас, людзей, магчымасць адраджэння адносін з нашым Стваральнікам, адраджэння да Новага Жыцця.

– Штогод католікі перажываюць перыяд Адвента, перыяд чакання прыйсця Хрыста. Гэты перыд (4 тыдні да свята Божага Нараджэння) адзначаны постам і малітвай, шчырай споведзю і аднаўленнем свайго сумлення, намераў і жыцця – усім тым, што дапамагае ачысціць душу і сэрца для таго, каб прыняць Хрыста ў сваё жыццё як асабістага Збаўцу ад свайго ўласнага граху, – працягвае Святлана. – Марыя – тая, якая нясе нам Хрыста, асабліва ў часе Божага Нараджэння. Марыя – Маці ўсіх людзей, бо на крыжы Езус даручыў ёй усё чалавецтва ў апеку. Марыя – Маці Новага Жыцця для кожнага, хто толькі пажадае перамен у сваім жыцці.

Далучайцеся!

Шлях да новага жыцця пачынаецца з першага кроку. Тэл. для запісу на рэкалекцыі: +375292800545.