У летні перыяд на Навагрудчыне плануецца аздаравіць амаль 2,5 тысячы дзяцей

19 апреля 2019 1319

Усяго паўтара месяца застаецца да пачатку самай любімай пары ўсіх школьнікаў – летніх канікулаў. Але мала хто з бацькоў мае магчымасць пастаянна быць разам са сваімі дзецьмі на працягу ўсяго лета. Як жа быць? Як правільна, цікава і карысна арганізаваць лета свайго сына ці дачкі? Усё проста – адправіць дзіця ў аздараўленчы лагер. Наш летні гід для тых, хто яшчэ не паспеў вызначыцца з выбарам летняга лагера. – Правільная арганізацыя летняга адпачынку – гэта шлях да паляпшэння здароўя, удасканалення здольнасцей дзіцяці, час адкрыццяў, прыгод, гульняў і новых сустрэч, – упэўнена начальнік упраўлення адукацыі райвыканкама Людміла МАРОЗ. – Летам 2019 года ўпраўленнем адукацыі арганізуецца работа 46 лагераў рознай накіраванасці і спецыфікі. Пры іх падрыхтоўцы вялікую ўвагу ўдзяляем стварэнню ўмоў для паляпшэння здароўя, бяспечнага прабывання дзяцей, арганізацыі цікавай і насычанай праграмы з экскурсіямі, разнастайнымі мерапрыемствамі і сустрэчамі, а таксама працоўнай занятасцю. Увогуле ў летні перыяд плануецца аздаравіць 2444 непаўналетніх і 108 падлеткаў будзе задзейнічана ў лагерах працы і адпачынку. Як расказала Людміла Мароз, перад планаваннем аздараўленчай кампаніі ва ўстановах адукацыі было праведзена анкетаванне, у якім юныя навагрудчане і іх бацькі выказалі свае прапановы наконт арганізацыі работы лагераў.

Лагер «Свіцязь» Вядома, самым папулярным месцам адпачынку хлопчыкаў і дзяўчынак з’яўляецца аздараўленчы лагер «Свіцязь». Сонца, чыстае паветра і вада разам з цікавымі і разнастайнымі праектамі змен гарантуюць кожнаму незабыўныя канікулы. Традыцыйна лагер працуе ў чатыры змены працягласцю 18 дзён па 165 чалавек у кожную. Змены профільныя, а значыць маюць сваю асаблівасць.

1 змена – з 1 па 18 чэрвеня (спартыўная + ваенна-патрыятычная) 2 змена – з 21 чэрвеня па 8 ліпеня (духоўна-маральная) 3 змена – з 11 па 28 ліпеня (лідарская) 4 змена – з 31 ліпеня па 17 жніўня (творчая)

Кожны дзень дасканала прадуманы і напоўнены шматлікімі забавамі, конкурсамі, віктарынамі, спортам, вандроўкамі, сустрэчамі і г.д. Адпачынак у аздараўленчым лагеры «Свіцязь» – гэта займальная летняя прыгода, якая пакіне ў дзяцей шмат станоўчых уражанняў.

Прышкольныя Найбольш усяго аздараўленчых лагераў падчас летніх канікулаў традыцыйна працуюць ва ўстановах адукацыі. Дзеці ў іх знаходзяцца толькі днём, адсюль і назва прышкольныя. Летам 2019 года ў раёне іх будзе працаваць 24 як у горадзе, так і ў сельскай мясцовасці. Адпачыць змогуць 800 дзяцей. Тут іх чакаюць сапраўдныя прыгоды, экскурсіі, квэст-гульні, забавы на свежым паветры, спартландыі і многае іншае. Педагогі імкнуцца так арганізаваць занятасць дзяцей, каб хлопчыкі і дзяўчынкі не толькі адпачылі, але і пашырылі свой кругагляд. Праграмы будуюцца такім чынам, што дзень за днём дзеці рухаюцца да пэўнай мэты, пастаўленай у пачатку змены. А напрыканцы ўсіх чакае ўзнагарода.

Палатачныя Аматараў турызму і прыгод задаволіць адапчынак у палатачным лагеры. Дзе, як ні тут, загартуецца калектыў, калі дзеці пад кіраўніцтвам настаўнікаў устанаўліваюць палаткі, нарыхтоўваюць дровы, разводзяць вогнішча, гатуюць ежу. Канешне, удзельнічаюць у спартыўных гульнях і розных конкурсах. Сёлета такія лагеры будуць працаваць на базе СШ № 1, 3, 4, 7 г. Навагрудка, Любчанскай СШ, Гарадзечанскага, Шчорсаўскага дзіцячых садоў-сярэдніх школ, Кашалеўскага, Ладзеніцкага, Вераб’евіцкага дзіцячых садоў-базавых школ, Навагрудскага раённага ЦТДіМ.

У маляўнічым месцы Некалькі гадоў таму ў вобласці пачалі рэалізоўваць праект па арганізацыі дзіцячых аздараўленчых лагераў на базе ўстаноў адукацыі, размешчаных у маляўнічых месцах. У нашым раёне такой пляцоўкай выступаў лагер «Свіцязь». Сёлета 9-дзённыя лагеры ў маляўнічым месцы з кругласутачным знаходжаннем дзяцей будуць працаваць на базе Пятрэвіцкага дз/с-СШ з 17 па 25 чэрвеня, Валеўскага дз/с-СШ з 15 па 23 ліпеня і Нягневіцкай СШ з 12 па 20 жніўня. У кожным лагеры, якія разлічаны на 40 чалавек, – свая асаблівая праграма. А вось агульнае – гэта свежае паветра і прыгожыя мясціны. Упэўнены, сумаваць не будзе ніхто, – адзначыла Л. Мароз. Працы і адпачынку Лагеры працы і адпачынку гарантуюць узаконеную і бяспечную работу для непаўналетніх, улічваючы іх ўзрост. А яшчэ – гэта дапамога ў вызначэнні будучай прафесіі, набыццё новага вопыту і ведаў па розных пытаннях працаўладкавання. Дзень у такім лагеры ўключае працоўную дзейнасць у першай палове дня і культурна-забаўляльную праграму ў другой. На працягу лета шэсць лагераў працы і адпачынку на 108 чалавек будуць працаваць на базе арганізацый і прадпрыемстваў Уселюбскага лясніцтва Навагрудскага ДЛГУ, ААТ «Шчорсы», ААТ «Прынёманскі», СВК «Нягневічы», сялянска-фермерскай гаспадаркі «Ясюкевіч» і на базе СШ №5.

У дадатак – Таксама будзе працаваць лагер з кругласутачным знаходжаннем дзяцей на базе спецыяльнай школы-інтэрната, разлічаны на 50 чалавек, – дадала Людміла Мароз. – Акрамя таго, на працягу ўсяго лета ўстановы адукацыі і іх спартыўныя пляцоўкі адкрыты для кожнага дзіцяці. У раённым Цэнтры творчасці дзяцей і моладзі падчас летніх канікулаў будуць праводзіцца конкурсна-гульнявыя і забаўляльныя праграмы, майстар-класы, інтэлектуальныя і спартыўныя гульні, будуць ладзіцца творчыя пляцоўкі, выстаўкі. Выбар – вялікі. Але часу застаецца не так шмат, таму арганізацыю летняга адпачынку дзяцей не варта адкладваць на апошнія дні. Паважаныя бацькі! Атрымаць дадатковыя звесткі аб рабоце аздараўленчых лагераў можна ва ўстановах адукацыі, дзе вучацца вашы дзеці, а таксама ва ўпраўленні адукацыі райвыканкама па тэл. 2-15-70. Анастасія Пятрова, «НЖ». Фота з архіва рэдакцыі і ўстаноў адукацыі Стоит почитать: Около 390 тыс. детей оздоровятся нынешним летом в Беларуси Каждый ребенок этим летом сможет отдохнуть в детском лагере. Куда обращаться?