Пры ўсім багацці відаў мяса, што сустракаецца сёння на паліцах айчынных магазінаў, субпрадукты не губляюць сваёй актуальнасці. Печань, сэрца, язык, жалудкі, вушы ды іншае — усё гэта беларусы актыўна ўжываюць у ежу. Яно і зразумела, паколькі гэта адпавядае нашым кулінарным традыцыям.
Напрыклад, у маёй сям’і ўсе без выключэння любяць сальцісон (праўда, называем яго «бобік») і крывянку з дамашняга кабанчыка. Гэта не проста ежа, а перадача культурнага коду праз векавыя рэцэпты, уменне рупліва абыходзіцца з тым, што маеш. Ці той жа халадзец са свіных капытоў, хваста і вушэй — смаката!
Немагчыма пераацаніць субпрадукты і як каштоўную крыніцу бялкоў, вітамінаў і мікраэлементаў. Дыетолагі рэкамендуюць 1–2 разы на месяц есці печань, якая багатая лёгказасваяльным жалезам, вітамінамі групы B і вітамінам A. Калі проста смажыць печань кавалачкамі, то ўзнікае вялікая рызыка яе перасушыць і зрабіць нясмачнай. Іншая справа — пячоначныя аладкі, якія маюць лёгкую тэкстуру і пяшчотны смак.
Вам спатрэбіцца:Для прыгатавання змяльчаем праз мясарубку ці ў блендэры печань і цыбулю. Важны нюанс — калі печань пакупная, то ёсць сэнс папярэдне замачыць яе ў малацэ, каб пазбавіцца ад горкага прысмаку. Далей умешваем у масу яйка і манку, дадаём соль і перац на смак. Пакідаем хвілін на 20, каб манка набухла. Кансістэнцыя будзе досыць вадкай. Выпякаем аладкі на алеі з абодвух бакоў да гатоўнасці (прыкладна 2–3 хвіліны). Выкладваем іх спачатку на папяровыя сурвэткі, каб прыбраць лішні тлушч. Падаём на стол з салатай і любімым соусам.
♦ печань свіная — 300 г
♦ манка — 50 г
♦ яйка — 1 шт
♦ цыбуля — 1 шт
♦ соль, перац на смак
СБ
