Смачная ежа і якасныя тавары
Як адзначыў намеснік міністра антыманапольнага рэгулявання і гандлю Алег Дзікун, часта пакупнікі нават не заўважаюць, што выбіраюць тавары айчыннай вытворчасці.
Алег Дзікун.
— Пад эгідай гэтай акцыі мы б хацелі перш за ўсё паказаць, што ў нас сапраўды добрыя, якасныя, смачныя прадукты, — растлумачыў ён.
Хто і як можа ўдзельнічаць? Да праекта запрашаюцца ўсе без выключэння. Юрыдычныя асобы і індывідуальныя прадпрымальнікі могуць далучыцца, запоўніўшы спецыяльную форму на сайце МАРГ. Удзел праяўляецца праз даданне ў меню аб’ектаў грамадскага харчавання нацыянальных страў, тэматычнае афармленне, правядзенне дэгустацый або ў спецыяльных прапановах на пакупку беларускіх тавараў. Спажыўцам (грамадзянам) прапануецца па пятніцах выбіраць тавары айчынных вытворцаў — ад куплі прадуктаў харчавання і адзення да праслухоўвання беларускай музыкі.
— Кожны з нас можа прыйсці на працу ў вопратцы ці абутку беларускага вытворцы, а ўвечары ў краме купіць айчынныя прадукты і прыгатаваць нейкую нацыянальную страву. Можна ехаць на машыне і слухаць беларускую музыку, — патлумачылі ў МАРГ.
Начальнік аддзела па забеспячэнні дзейнасці кіраўніцтва міністэрства і ідэалагічнай працы Кацярына Ціханчук адзначыла:
— Мы ўсе разумеем, што ў нас смачная ежа і якасныя тавары. Мы з гэтым жывём, аднак важна падкрэсліваць гэта для ўсіх катэгорый нашага насельніцтва — як для моладзі, так і для старэйшага пакалення. Гэта ўсё наша. Таму выбралі пятніцу, каб людзі маглі расслабіцца і акунуцца ў родную беларускую атмасферу.
Кацярына Ціханчук таксама паведаміла, што аб’екты гандлю і грамадскага харчавання ўжо атрымалі рэкамендацыі і прыкладны пералік ідэй, але пры гэтым могуць распрацоўваць свае ўласныя прапановы з улікам спецыфікі працы.
Асаблівая ўвага падчас праекта будзе нада-дзена беларускім стравам.
— У нашай краіне дастаткова ўстаноў, якія спецыялізуюцца на беларускай кухні, — адзначыла Кацярына Ціханчук. — Мы хацелі б, каб яны прапанавалі акцыйныя пазіцыі і цікавыя пятнічныя сэты як для мясцовых жыхароў, так і для замежнікаў, бо многія прыязджаюць да нас пакаштаваць традыцыйныя стравы і дэсерты. Таксама хацелася б звярнуцца да рэгіёнаў: у кожным з іх ёсць унікальныя лакальныя стравы, пра якія не ўсе ведаюць, але іх можна пакаштаваць у мясцовых установах. У пятніцу можна прадумаць цікавую падачу і расказаць пра гісторыю гэтых страў.
Традыцыйныя прысмакі
Да грамадскага праекта далучыліся і кааператары. Мінаблспажыўсаюз на працягу студзеня прапаноўваў па пятніцах у сваіх кафэ і рэстаранах дранікі са смятанай. У лютым аматараў паласавацца беларускімі прысмакамі чакаюць бліны.
Смак традыцыйнай стравы ацанілі жыхары розных гарадоў сталічнага рэгіёна. Да спадобы прыйшліся дранікі ў рэстаране «Нёман» горада Узда, дзе госці без выключэння зрабілі выснову: зусім нядорага — і адзначылі, што дзякучы акцыі змаглі адчуць сапраўдны смак гэтай традыцыйнай стравы. Іх тонкая хрумсткая скарыначка, прыемная тэкстура прапечанага цеста і ідэальна збалансаваны смак сапраўдная гастранамічная класіка. А кошт — усяго 2,99 рубля.
Калі хто хацеў разнастаіць свой абед, можна было заказаць таксама і боршч.
— Суп — проста захапленне! — падзялілася наведвальніца рэстарана ў горадзе Узда Галіна Сілівончык. — Наварысты, з глыбокім смакам і лёгкай кіслінкай, ён склаў выдатную кампанію дранікам. Такі абед — лепшы спосаб адчуць гасціннасць Беларусі, не выязджаючы з горада.
Як паведамілі ў прэс-службе Белкаапсаюза, акцыя прыйшлася да спадобы наведвальнікам рэстаранаў і кафэ Мінаблспажыўсаюза. За студзень кааператары рэалізавалі 5 тысяч порцый папулярнай стравы беларускай кухні.
— Мы самі не чакалі такой колькасці цёплых водгукаў ад наведвальнікаў, — адзначыў начальнік сектара грамадскага харчавання Мінскага аблспажыўсаюза Аляксандр Пішчык. — Калі пачыналі акцыю, проста хацелі, каб больш людзей паспрабавалі сапраўдныя беларускія дранікі. А вынікі пераўзышлі ўсе нашы чаканні!
Дарэчы, гэта толькі пачатак смачнай гісторыі. У лютым, якраз у чаканні Масленіцы, кааператары яшчэ парадуюць зніжкамі падчас акцыі «Кожная пятніца — дзень роднага, свайго», дзе галоўнай стравай стануць беларускія бліны.
ФАКТ
У студзені за час акцыі «Дранік цэнтральнага рэгіёна» пад эгідай акцыі МАРГ «Кожная пятніца — роднае, сваё» кааператыры Міншчыны прадалі больш за пяць тысяч порцый дранікаў са смятанай.
ВАЖНА
Асаблівасць ініцыятывы — у адсутнасці жорсткіх рамак, абавязацельстваў і забарон. Удзельнікі самастойна вырашаюць, як менавіта падтрымаць ідэю.
НА ЗАМЕТКУ
Для аб’яднання ўдзельнікаў у сацсетках патрэбна выкарыстоўваць хэштэг #ДзеньРоднагаСвайго.
СБ
