Адыходзіць у гісторыю 2019 год. Якім ён быў, што добрага прынёс жыхарам нашага раёна і чаго чакаць ад новага года? Самы час азірнуцца назад, успомніць найбольш яркія падзеі, ацаніць зробленае і намеціць планы на будучыню. Пра гэта наша традыцыйнае навагодняе інтэрв’ю са старшынёй Навагрудскага райвыканкама Сяргеем Федчанкам.
– Сяргей Аляксандравіч, адыходзячы год для Вас быў першым годам работы ў Навагрудскім раёне. Чым ён вам запомніўся?
– Гэты год для мяне быў вельмі насычаным і цікавым. Сапраўды, я змяніў сферу дзейнасці: ішло знаёмства з калектывамі, прадпрыемствамі, вывучэнне ўсіх сфер жыццядзейнасці раёна. Работы было шмат, таму і год праляцеў як адзін дзень.
– Чым адзначаны 2019 год для рэальнага сектара эканомікі нашага раёна?
– Адыходзячы год для эканомікі раёна склаўся даволі паспяхова. Добрых вынікаў у сваім развіцці дасягнулі прадпрыемствы прамысловасці. Аб’ём вытворчасці ў сумарным выражэнні павялічыўся на 11,5%, па індэксе фізічнага аб’ёму – на 5%, і гэта 3-і вынік па вобласці. Уся прадукцыя, выпушчаная прадпрыемствамі, рэалізоўвалася, большасць – на экспарт. Мы пастаўляем прадукцыю ў больш чым 20 краін свету. 50% экспарту раёна забяспечвае філіял «Навагрудскія дары» ААТ «Лідскі малочна-кансервавы камбінат», 22% ААТ «Навагрудскі завод газавай апаратуры», 15% СП «ЛеорПластык». У бягучым годзе прамысловыя прадпрыемствы раёна неаднаразова ўдастойваліся ўзнагарод як рэспубліканскага, так і міжнароднага ўзроўняў. Навагрудскі завод газавай апаратуры па выніках сацыяльна-эканамічнага развіцця ў гэтым годзе ўвайшоў у трыццатку лепшых прадпрыемстваў краіны. Стабільна працуе філіял «Навагрудскія дары», які заканчвае год з прыбыткам. 75-годдзе адзначылі сёлета ААТ «Навагрудскі завод металавырабаў», «БелКрэда». Ішла мадэрнізацыя прадпрыемстваў, так Навагрудскі хлебазавод увёў у эксплуатацыю кандытарскі цэх. Важкі ўклад у эканоміку раёна ўнесла будаўнічая галіна. Навагрудскім БМУ ў гэтым годзе пабудаваны два дамы на 89 кватэр, вялася рэканструкцыя сямі малочнатаварных ферм. Працягваецца будаўніцтва фізкультурна-аздараўленчага комплекса – ужо асвоена каля 7,5 млн рублёў інвестыцый.
– Як склаўся гэты год для сельскай гаспадаркі?
– Сельская гаспадарка дэманструе добрыя вынікі. Валавая вытворчасць сельскагаспадарчай прадукцыі ў параўнанні з мінулым годам павялічылася на 9%. Атрымана 72 тыс. тон зерня пры ўраджайнасці 36,9 ц/га, 7200 тон зерня кукурузы, ураджайнасць якой склала больш за 160 ц/га. Сабраны добры ўраджай цукровых буракоў – 120 тыс. тон пры ўраджайнасці 650 ц/га. Добра падрыхтаваліся аграрыі да зімова-стойлавага перыяду жывёл. На адну ўмоўную галаву нарыхтавана каля 32 цэнтнераў кармавых адзінак – і гэта другі вынік у вобласці. Добрыя паказчыкі ў жывёлагадоўлі. Павялічваюцца надоі малака, па выніках года надой на карову складзе каля 5250 кг малака, што амаль на 400 кг больш, чым летась.
– Як Вам бачыцца дзейнасць сацыяльнай сферы?
– Стабільна працуе сацыяльная сфера: праводзілася абнаўленне і мадэрнізацыя матэрыяльна-тэхнічнай базы ўстаноў. У сферы адукацыі 13 дыпломаў абласнога і 1 рэспубліканскага ўзроўню заваявана навучэнцамі раёна ў алімпіядах па вучэбных прадметах. Па выніках выпускной кампаніі 40 выпускнікоў 11-х класаў узнагароджаны залатымі медалямі, 71,4% выпускнікоў сталі студэнтамі ўстаноў вышэйшай адукацыі. Палепшылася матэрыяльна-тэхнічная база раённай бальніцы: набываецца новае медыцынскае абсталяванне, праведзены рамонтныя работы першага паверха паліклінікі, рэанімацыйнага аддзялення. Штогод калектывы ўстаноў аховы здароўя папаўняюцца маладымі спецыялістамі.
Шмат мерапрыемстваў адбылося ў культурнай сферы. Самым значным стала святкаванне 975-годдзя горада, якое прадэманстравала навагрудчанам і гасцям, што ў нас удала спалучаюцца гісторыя і традыцыі, культура і самабытнасць. Важная падзея адбылася ў лютым, калі ў Навагрудскай раённай бібліятэцы прайшла прэзентацыя і ўрачыстая перадача ў дар ад Пасольства Украіны ў Рэспубліцы Беларусь факсімільнага выдання Лаўрышаўскага Евангелля. У чэрвені на Навагрудчыне прайшоў XV Рэспубліканскі экалагічны форум, які таксама стаў знакавай падзеяй.
– Кожны год прыносіць у жыццё і асобнага чалавека, і ўсяго раёна, і ўсёй краіны нешта новае. Для Беларусі 2020 – год 75-годдзя Вялікай Перамогі і год прэзідэнцкіх выбараў. Раскажыце, калі ласка, якія важныя і цікавыя падзеі чакаюць жыхароў Навагрудчыны ў 2020 годзе.
– Навагрудчына, як і заўжды, далучыцца да самых знакавых падзей краіны. У межах святкавання 75-годдзя Вялікай Перамогі ў раёне пройдзе шэраг мерапрыемстваў. Упэўнены, што гэтак жа арганізавана і актыўна, як парламенцкія, пройдуць у раёне і выбары Прэзідэнта краіны. Да таго ж з Навагрудчынай звязаны лёсы многіх вядомых людзей. Так, у 2020 годзе пройдуць мерапрыемствы, прысвечаныя памяці У. Высоцкага. Не менш важная падзея – 20-годдзе ўстанаўлення пабрацімства паміж Эльблонгам і Навагрудкам.
Яшчэ адна значная падзея будучага года – увод у эксплуатацыю фізкультурна-аздараўленчага комплексу. І гэта толькі невялікая частка ўсіх тых мерапрыемстваў, якія пройдуць у наступным годзе ў нашым раёне. А іх будзе больш за двесце.
– Новы год – свята, якое любяць людзі ўсіх узростаў. Якія навагоднія традыцыі ёсць у Вашай сям’і? Як будзеце сустракаць свята?
– Як у многіх, у нашай сям’і Новы год – гэта сямейнае свята, калі мы ўсе збіраемся разам – дзеці, унукі. Яшчэ да Новага года ўнукі пішуць пісьмо Дзеду Марозу, і абавязкова ўсе іх пажаданні збываюцца, толькі іх пералік з кожным годам узрастае. Спадзяюся, што і гэты Новы год мы адзначым усёй сям’ёй.
– Сяргей Аляксандравіч, што б Вы пажадалі чытачам нашай газеты і жыхарам Навагрудскага раёна?
– Дарагія навагрудчане, мы з вамі прайшлі 2019 год разам. Магчыма, ён быў няпросты, але ж прадуктыўны – мы з дастойнымі вынікамі сустракаем надыходзячы год. Я ўсім удзячны за падтрымку, якую вы мне аказалі. Ад усёй душы жадаю вам моцнага здароўя, міру і дабрабыту ў сем’ях. Няхай усё добрае прымножыцца, спраўдзяцца мары і надзеі, поспехаў вам ва ўсіх справах і пачынаннях, плённай працы на карысць нашага роднага Навагрудскага раёна. З надыходзячым Новым 2020 годам!
Падрыхтавала Алена Ганцэвіч, «НЖ»