Былі разгледжаны звароты 8 грамадзян, уключаных у базу даных не занятых у эканоміцы, якія прадставілі адпаведныя дакументы аб працаўладкаванні. Яны працуюць па працоўных дагаворах за межамі краіны – у Расіі, Украіне, Польшчы і інш. У асноўным навагрудчане працуюць за мяжой у кампаніях, якія займаюцца міжнароднымі перавозкамі, на швейнай вытворчасці. Сярод тых, хто звярнуўся ў камісію, быў грамадзянін, які з’яўляецца ўласнікам кватэры і пацвердзіў сваю занятасць працоўным дагаворам, які быў заключаны ў Польшчы са жніўня 2018 года. Паколькі ён раней быў уключаны у спіс грамадзян, якія павінны аплачваць паслугі з кампенсацыяй затрат, будзе праведзены пераразлік аплаты за паслугі ЖКГ па гарачым водазабеспячэнні па субсідзіруемых цэнах за красавік-вераснь 2019 года.
Станоўча камісія вырашыла і пытанне аб прызнанні занятым у эканоміцы маладога чалавека, хоць ён і не з’яўляецца ўласнікам жылля. Хлопец атрымлівае вышэйшую адукацыю ў Майкопскім дзяржаўным тэхналагічным універсітэце (Расія). Так як тэрмін навучання ў ВНУ доўжыцца да канца жніўня 2021 года, на гэты час ён будзе лічыцца занятым у эканоміцы.
Наведала камісію і жанчына, якая з’яўляецца ўласніцай кватэры ў Навагрудку, тут прапісана, але доўгі час па сямейных абставінах пражывае ў г. Мінску. Яна спачатку ажыццяўляла догляд за дачкой-інвалідам да 18 гадоў. Зараз дачцэ 24 гады, інваліднасць знята, яна нарадзіла дзіця і знаходзіцца ў дэкрэтным водпуску.
Сама жанчына таксама стала скардзіцца на сваё здароўе, і гэта з’яўляецца асноўнай прычынай, па якой яна не працуе. На камісію яна прыйшла з пытаннем: што рабіць з аплатай за ацяпленне кватэры па поўным тарыфе падчас ацяпляльнага сезона? У кватэры ніхто не пражывае, лічыльнікі вады і газу адключаны.
Як кажуць, бязвыхадных сітуацый не бывае. Жанчыне патлумачылі, што тэрмін аплаты працаздольнымі грамадзянамі, не занятымі ў эканоміцы, асобных камунальных паслуг (за карыстанне газам і ацяпленнем) па поўным тарыфе перанеслі да 1 мая 2020 года;
У будучым варыянты таксама ёсць: па-першае, калі стан здароўя не дазваляе працаваць, трэба звярнуцца ва ўстанову аховы здароўя, і калі ёсць паказанні, аформіць групу інваліднасці; па-другое, кватэру ў Навагрудку можна здаць для пражывання з афармленнем афіцыйнага дагавора ў падаткавых органах. Гэта дазволіць выключыць чалавека з базы даных не занятых у эканоміцы на пэўны тэрмін.
Яшчэ адна з сітуацый, якая характэрна для тых грамадзян, якія працуюць у індывідуальных прадпрымальнікаў. Так, жыхар горада прадставіў у камісію працоўны дагавор, які быў заключаны ў 2011 годзе з індывідуальным прадпрымальнікам. У дагаворы, дзе ўказваецца заработная плата, напісана: «без заработнай платы».
Для прыняцця правільнага рашэння неабходна звярнуцца да дзеючага заканадаўства нашай краіны. Згодна арт. 57 Працоўнага кодэкса, заработная плата – гэта ўзнагароджанне за працу, якую наймальнік абавязаны выплаціць работніку за выкананую працу ў залежнасці ад яе складанасці, колькасці, якасці, умоў працы і кваліфікацыі работніка з улікам фактычна адпрацаванага часу, а таксама за перыяды, якія ўключаюцца ў працоўны час.
Акрамя гэтага, у Законе Рэспублікі Беларусь ад 15 чэрвеня 2006 г. № 125-З «Аб занятасці насельніцтва Рэспублікі Беларусь» у арт.1 ёсць такое паняцце: занятасць – дзейнасць грамадзян Рэспублікі Беларусь, замежных грамадзян і асоб без грамадзянства, якія пастаянна пражываюць у Рэспубліцы Беларусь, замежных грамадзян і асоб без грамадзянства, якім прадастаўлены статус бежанца або прытулак у Рэспубліцы Беларусь, звязаны з задавальненнем асабістых і грамадскіх патрэб, якая не супярэчаць заканадаўству і прыносіць ім заработную плату, узнагароджанне за выкананую працу (аказаную паслугу, стварэнне аб’ектаў інтэлектуальнай уласнасці), іншы даход.
У выніку, на падставе прадстаўленых дакументаў, камісія ўгледзела ў дадзеным дагаворы парушэнне дзеючага заканадаўства Рэспублікі Беларусь і аднагалосна прыняла рашэнне аб адмове прызнаць грамадзяніна занятым у эканоміцы і прапанавала прадаставіць іншыя дакументы, якія могуць пацвердзіць яго занятасць.
За ўвесь час работы камісія не разглядала падобных выпадкаў. Падчас абмеркавання члены камісіі звярнулі таксама ўвагу на добрасумленнасць наймальніка, які на такіх умовах заключае працоўны дагавор. Адначасова паўстала пытанне: ці ажыцяўляюцца за такімі работнікамі адлічэнні ў Фонд сацыяльнай абароны насельніцтва, паколькі гэта вядзе да адсутнасці сацыяльных гарантый (не налічваецца страхавы стаж, а адпаведна ідзе недаатрыманне пенсіі, неаплата бальнічных лістоў і іншых выплат са сродкаў фонду сацыяльнай абароны насельніцтва).
У тэму Па выніках работы камісіі за 3 квартал бягучага года 51 чалавек аднесены да працаздольных грамадзян не занятых у эканоміцы ў адпаведнасці з п. 2 Палажэння і ўключаны ў спіс грамадзян, якія аплачваюць паслугі ЖКГ з пакрыццём выдаткаў.
Старшыня раённай камісіі, старшыня раённага Савета дэпутатаў Сяргей Мішарын, падводзячы вынікі пасяджэння, заўважыў, што павінна аказвацца дзейсная прафесійная дапамога кожнаму чалавеку, які звярнуўся ў камісію, і ўлічвацца пры вынясенні рашэння ўсе жыццёвыя абставіны людзей, і абавязкава падтрымаць тых, хто хоча працаўладкавацца.
Алена Ермакова, «НЖ»