Вясна. Часу для пасадкі саджанцаў застаецца мала, неабходна каб саджанцы за лета паспелі прыжыцца на новым месцы і ў поўнай гатоўнасці маглі сустракаць зіму. На заклік далучыцца да пасадкі дрэў у Год малой радзімы, а таксама да 75-годдзя Перамогі ў Вялікай Айчыннай вайне, з радасцю адгукнуліся выхаванцы Нягневіцкага ДЦРД.
Колькі задавальнення ад гэтага карыснага занятку! Дружная кампанія, чыстае паветра, спеў птушак, цудоўнае сонечнае надвор’е і ўсведамленне таго, што праз дзясятак гадоў вырасце з саджанца сапраўднае дрэва, надавалі сіл. І гэта выдатна, калі дзіця, стаўшы дарослым, зможа сказаць: “Гэта дрэва пасадзіў я сам". Дрэўцы пасаджаныя імі будуць радаваць шматлікія пакаленні іншых дзетак, якія будуць наведваць наш дзіцячы сад.
Кожны выхаванец ведае, што азеляненне планеты – вельмі важная справа. А само дрэва – сімвал міру, напамін пра далікатнасць прыроды і неабходнасць яе абароны, таму працавалі ўсе з вялікім энтузіязмам і нават захапленнем, бо многія з іх саджалі дзіўнай прыгажосці дрэва ўпершыню.
Удзельнікі акцыі вераць, што пасаджаныя імі саджанцы прыжывуцца і будуць радаваць сваёй прыгажосцю. Так, агульнымі намаганнямі ўнесены ўклад у захаванне навакольнага асяроддзя роднага краю.
Вольга Война,
настаўнік-дэфектолаг |